मुख्य सामग्री पर जाएँ
ॐ दिव्य ग्रंथ

वाल्मीकि रामायण बालकाण्ड सर्ग 34

वाल्मीकि रामायण बालकाण्ड सर्ग 34 का उपलब्ध मूल पाठ दिव्य ग्रंथ पर पढ़ें। संस्करण और भाषा संबंधित पुस्तक के स्रोत नोट के अनुसार हैं।

वाल्मीकि रामायण के पुस्तक आवरण का चित्र
दिव्य ग्रंथ · मूल पाठ संग्रह

श्लोक 1

कृत उद्वाहे गते तस्मिन् ब्रह्मदत्ते च राघव ।अपुत्रः पुत्र लाभाय पौत्रीम् इष्टिम् अकल्पयत् ॥१-३४-१॥

श्लोक 2

इष्ट्याम् तु वर्तमानायाम् कुशनाभम् महीपतिम् ।उवाच परमोदारः कुशो ब्रह्मसुतः तदा ॥१-३४-२॥

श्लोक 3

पुत्रः ते सदृशः पुत्र भविष्यति सुधार्मिकः ।गाधिम् प्राप्स्यसि तेन त्वम् कीर्तिम् लोके च शाश्वतीम् ॥१-३४-३॥

श्लोक 4

एवम् उक्त्वा कुशो राम कुशनाभम् महीपतिम् ।जगाम आकाशम् आविश्य ब्रह्म लोकम् सनातनम् ॥१-३४-४॥

श्लोक 5

कस्यचित् तु अथ कालस्य कुशनाभस्य धीमतः ।जज्ञे परम धर्मिष्ठो गाधिः इति एव नामतः ॥१-३४-५॥

श्लोक 6

स पिता मम काकुत्स्थ गाधिः परम धार्मिकः ।कुश वंश प्रसूतो अस्मि कौशिको रघुनंदन ॥१-३४-६॥

श्लोक 7

पूर्वजा भगिनी च अपि मम राघव सुव्रता ।नाम्ना सत्यवती नाम ऋचीके प्रतिपादिता ॥१-३४-७॥

श्लोक 8

सशरीरा गता स्वर्गम् भर्तारम् अनुवर्तिनी ।कौशिकी परमोदारा सा प्रवृत्ता महानदी ॥१-३४-८॥

श्लोक 9

दिव्या पुण्य उदका रम्या हिमवंतम् उपाश्रिता ।लोकस्य हितकार्य अर्थम् प्रवृत्ता भगिनी मम ॥१-३४-९॥

श्लोक 10

ततो अहम् हिमवत् पार्श्वे वसामि नियतः सुखम् ।भगिन्याम् स्नेह संयुक्तः कौशिक्या रघुनंदन ॥१-३४-१०॥

श्लोक 11

सा तु सत्यवती पुण्या सत्ये धर्मे प्रतिष्ठिता ।पतिव्रता महाभागा कौशिकी सरिताम् वरा ॥१-३४-११॥

श्लोक 12

अहम् हि नियमात् राम हित्वा ताम् समुपागतः ।सिद्ध आश्रमम् अनुप्राप्तः सिद्धो अस्मि तव तेजसा ॥१-३४-१२॥

श्लोक 13

एषा राम मम उत्पत्तिः स्वस्य वंशस्य कीर्तिता ।देशस्य च महाबाहो यन् माम् त्वम् परिपृच्छसि ॥१-३४-१३॥

श्लोक 14

गतो अर्ध रात्रः काकुत्स्थ कथाः कथयतो मम ।निद्राम् अभ्येहि भद्रम् ते मा भूत् विघ्नो अध्वनि इह नः ॥१-३४-१४॥

श्लोक 15

निष्पन्दाः तरवः सर्वे निलीना मृग पक्षिणः ।नैशेन तमसा व्याप्ता दिशः च रघुनंदन ॥१-३४-१५॥

श्लोक 16

शनैः विसृज्यते संध्या नभो नेत्रैः इव आवृतम् ।नक्षत्र तारा गहनम् ज्योतिर्भिः अवभासते ॥१-३४-१६॥

श्लोक 17

उत्तिष्ठते च शीतांशुः शशी लोक तमो नुदः ।ह्लादयन् प्राणिनाम् लोके मनांसि प्रभया स्वया ॥१-३४-१७॥

श्लोक 18

नैशानि सर्व भूतानि प्रचरंति ततः ततः ।यक्ष राक्षस संघाः च रौद्राः च पिशित अशनाः ॥१-३४-१८॥

श्लोक 19

एवम् उक्त्वा महातेजा विरराम महामुनिः ।साधु साधु इति ते सर्वे मुनयो हि अभ्यपूजयन् ॥१-३४-१९॥

श्लोक 20

कुशिकनाम् अयम् वंशो महान् धर्मपरः सदा ।ब्रह्म उपमा महात्मनः कुशवंश्या नरोत्तम ॥१-३४-२०॥

श्लोक 21

विशेषेण भवान् एव विश्वामित्र महायशः ।कौशिकी सरिताम् श्रेष्ठः कुल उद्योतकरी तव ॥१-३४-२१॥

श्लोक 22

मुदितैः मुनि शार्दूलैः प्रशस्तः कुशिक आत्मजः ।निद्राम् उपागमत् श्रीमान् अस्तम् गत इव अंशुमान् ॥१-३४-२२॥

श्लोक 23

रामो अपि सह सौमित्रिः किंचित् आगत विस्मयः ।प्रशस्य मुनि शार्दूलम् निद्राम् समुपसेवते ॥१-३४-२३॥

मूल पुस्तक के इंटरैक्टिव पाठक में पढ़ें · सभी मूल पाठ